PETUAH MORAL TEOLOGIS-ADAT – 2

UNTUK KEPALA DAN WAKIL DAERAH KABUPATEN LEMBATA

MASA KERJA 2011 - 2016

Ana suku mukin, bai bale norok,

Ari, mei papak, reu, worak lola,

Opo, motin tou, lake, maun ehak

Kopong lewo nudhan, mamung tana kenahin,

Pana sare, tula teka...,  gawe mela, luga tuba...

Lewo-tana huda-gaha, riang-wetan adok-gahing

Ola dike lekat sare, tula tueng luga balik susa suku lepanbatan

Lera-wulan tokun-tude, Tana-ekan prawi-pradok

Puring muren behing bener, gelu ulang gaweng gehak paya lango lomblein

Niku getang tulung gole hama kakan dano arin

Pana teden odun dorat helo opun dano binen

Tobo talin pae gelak main bai dano lake

Koda keru marin baki, kirin wai dano selan

koda tepo ake bolak…, kirin lhengen ake geto...

Peten belek sudi belolo, peten ake mo gelhupan sudi ake mo gelhulin

Turu rehman peten dike, tobo leron sudi sare

Peten koda Kayo-puken, sudi kirin Wai-matan

Nenaw ama pulo kake, naot bine lema kae

Ola ake mabe pile, lekat ake mabe lalan

Niku ake lepet matam, dengen ake gulek tilum

Tutu dike marin sare, tula ulin luga rekan

Tutu ake puhung koda, marin ake pogel kirin

Goon ake mabe hipa..., menu ake mabe horong...

Koda Tuan lera-wulan, helo kung, hulu laran

Tao sare koteng onen, Petan ake mo gelhupang

Kirin Ala tana-ekan, hama padu, noning ewa

Neka mela naim tukan, sudi ake mo gelhulin

Nuba suku liman ola, nara lango lein lekat

Kopong lewo-tana tilun, mamung riang-wetan matan

Niku tedon kode dike, dengan dore kirin sare

Mayang dahan-geter maring, Gute-sorong hode-nein

 Gute ake mabe hewul…, hode ake mabe gewong…

Ola ake mabe helang, lekat ake mabe gawe

Puring ake mabe pile, behing ake mabe lalan

Niku-tulun pao-boe nuba pulo lepanbatan

Sudi-sadan puli-paal nara lema lomblein

Pana sare tula teka..., gawe mela luga tuba

Koda tepo ake bolak..., kiring lhengan ake geto...

Goon ake mabe hipa…, menu ake mabe horon…

Gute ake mabe hewul…, hode ake mabe gewong…

 Tutu ake puhung koda…, maring ake pogel kiring…

Koda Tuan lera-wulan, nenaw Kayo-puken pito

Kirin Ala tana-ekan, naot Wai-matan lema

Helo kung, hulu laran, hama padu, noning ewa

Tao sare koteng onen, neka mela naim tukan.

________&&&_________

Fr. Lukas Betekeneng, CMM.