PETUAH MORAL TEOLOGIS-ADAT

UNTUK KEPALA DAN WAKIL DAERAH KABUPATEN LEMBATA

MASA KERJA 2011-2016

Nuba suku nabe bote, nara lango nabe baking;

Kopong lewo nabe jadi, mamung tana nabe gewak.

Tobo leron peten doan, turu rheman sudi lelat;

peten ake mo gelhupang, sudi ake mo gelhulin.

Ola lekat, niku getang, ola ake mabe pile;

puring behin, tulung gole, puring ake mabe lalan.

liko nuhum lapak wewam, koda muren kiring bener;

uten lein lakan liman, tula ulin luga rekan.

Peten belek sudi belolo, ola dike lekat mela;

niku getang tulung gole, puring sare behing bener.

Lewo tedun laran weli, leim nai todok hala;

Suku huda nuba pana, ola lekat ribu pito.

Tana bawak ewa rae, liman nai walet kurang;

Lango gahing nara gawe, puring behing ratu lema.

Ola lekat, niku getang, puring behing, tulung gole

Ola ake mabe pile, lekat ake mabe lalan

Puring ake mabe bage, behing ake mabe bokot

Mupul nuba taling nara maan kakan dano aring, maing opung dano binen

Mayang getang gasik gole, hukut dike seba sare

Tula tueng ribu pito, tula demong helo kakan dano arin

Geter muren dahang bener, niku dike ake hobing, tulung sare ake howot

Luga balik ratu lema, luga paji maing opun dano binen

Wata, utang, ipat peku, soron getang maan pao ana Tuan Lera-wulan

Tuak, tapo, wai, selan, neen gole maan boe bai Ala Tana-ekan

Ola dike lekat sare, itit naran lewo-tana hange gere ile rae

Puring mela behing bener, sogan maken riang-wetan  golo lodo wokal lau

Tuun pito hau getang,  wulan lema haka gole

Susa tobo nhawe hala; paya pae pitan kurang

budi dike, mo tula tao nuan weli, tedung leim gere tobo nhatan tukan

goon sare, tobo mupul moting tou moon Puken pito kae

Lera liki ile bolak, seni balik wokal golot

Hemuk hipa higu hala, ferok deung kela kurang;

 akal mela, mo luga genang leron ia, bawak liman gawe pae bale lolon

menu mela, gelak taling maung ehak moon Nawan lema kae

________&&&___________

Fr. Lukas Betekeneng, CMM.